Bækurnar
- Þríleikurinn
- Bók 1
- Bók 2
- Bók 3
Höfundurinn
- Um Pullman
- Viðtal 1
- Viðtal 2
Kvikmyndir
- Mynd 1
- Myndir 2+3
- Dómar
Annað
- Fylgjur
- Orðasafn
- Persónur
- ENGLISH
Vefmeistari

Síðast uppfært
29. desember
2007

Gestur nr.
../Teljari

 

Búin að sjá myndina
Við hjónin fórum í Laugarásbíó á frumsýningardaginn til að sjá myndina um Gyllta áttavitann. Ég er ánægð með marga hluti, til dæmis val á leikurum, og þá sérstaklega í hlutverk frú Coulter, Lee Scoresbys og Lýru. Apinn hennar frú Coulter er nákvæmlega eins og ég hugsaði mér hann og samspilið á milli þeirra einstakt. Ég er yfir mig hrifin af tækninni varðandi fylgjurnar; þær eru svo raunverulegar að ég var næstum einmana að ganga út úr Laugarásbíói án fylgju og tók bara í arminn á eiginmanninum sem er ánægður með þetta hlutverk.
......En svo eru hlutir sem gera trygga aðdáendur bókanna, eins og mig, svolítið vonsvikna. Hvað á það að þýða að klippa út eina áhrifamestu senuna í myndinni - lokasenuna með Asríel lávarði? Af hverju var frú Coulter látin segja Lýru sannleikann um uppruna hennar en ekki Costamamman (Ma Costa) eins og í bókinni? Af hverju breytir Jöfur Raknisson (Iofur Raknisson) um nafn og heitir allt í einu Ragnar?
......Jæja, ég gæti haldið lengi áfram en ég verð samt að viðurkenna að ég naut þess að horfa á myndina og klökknaði meira að segja undir ísbjarnaslagnum mikla. Ég ráðlegg öllum að sjá myndina - en verið endilega búin að lesa bókina. Eftir lestur hennar skilur maður hið mikla ævintýri, alla þessa sterku strauma sem leika um heim Lýru, valdagræðgina og baráttu Lýru til að bjarga heiminum.
29. desember 2007

Frumsýning á morgun
Jæja, þá er komið að því. Fyrsta myndin um Gyllta áttavitann verður frumsýnd á morgun! Ég hef beðið spennt eftir boðsmiða - sem háttvirtur þýðandi bókanna - en ekkert hefur borist. Þá fer ég bara og kaupi miða og hlakka rosalega til að sjá myndina. Góða skemmtun, öllsömul!
25. desember 2007

Bækur í jólagjöf
Þótt bækurnar um Gyllta áttavitann, Lúmska hnífinn og Skuggasjónaukann hafi verið endurútgefnar í kiljuformi í haust hafa þær ekki mikið verið auglýstar. Mér finnst það synd vegna þess að frumsýning myndarinnar gefur ríkt tilefni til þess að vekja athygli á bókunum. En sem betur fer veit ég um marga sem fengu jafnvel allan þvíleikinn í jólagjöf. Það er fólkið sem er með slökkt á farsímanum í dag.
25. desember 2007

Kynningarmyndbandið
Þegar ég horfði á þetta kynningarmyndband fékk ég gæsahúð aftan á hálsinn. Rosalega er þetta vel gert! Desember 2007 verður góður mánuður, sannið til! Smellið hér til að skoða kynningarmyndbandið („trailer“) og ég er viss um að þið verðið jafn spennt og ég. Frábært!
30. júní 2007


Meira um myndina
Ég veit aðeins meira um myndina núna (og er búin að finna plakatið!). Sjá síðuna um kvikvmyndina.
22. apríl 2007

Myndin er á leiðinni
Nú hefur verið tilkynnt að frumsýningardagur fyrstu myndarinnar um þríleik Pullmans verði þann 1. desember 2007. Jólin það árið verða frábær! Búið er að ráða aðalleikarana og þeir eru ekki af verri endanum:

Nicole Kidman verður frú Coulter
Daniel Craig (hinn nýi James Bond) verður Asríel lávarður
Eva Green verður Serafína Pekkala
Tólf ára stelpa, Dakota Blue Richards, leikur Lýru Belaqua. Mér tekst ekki að finna nokkra mynd af henni, en framleiðendur myndarinnar, New Line Cinema, kolféllu víst fyrir henni og segja hana lýsa upp tjaldið eins og enginn annar gæti gert. Hér er alla vega mynd af biðröðinni sem myndaðist í Cambridge þegar áheyrnarprufurnar fóru fram.

 

Sá orðrómur gengur að hér verði kvikmyndir sem slái við Harry Potter og jafnist á við Hringadróttinssögu. Skrifa meira bráðum
Mánudagur 21. ágúst 2006

Um bækurnar
Þeir sem
njóta þess að láta bækur heilla sig og hrifsa sig með sér inn í annan heim, þeir sem vilja gleyma stað og stund og upplifa eitthvað allt öðruvísi en þeir hafa nokkurn tíma áður upplifað, ættu að lesa þessar þrjár óvenjulegu bækur.

Hvort sem þú ert 10 ára eða 90 ára, hlýturðu að hafa gaman af myrkraefna-þríleik Philips Pullman. Ég, þýðandinn (Anna Heiða Pálsdóttir), féll kylliflöt fyrir fyrstu bókinni, Gyllta áttavitanum (Northern Lights í Bretlandi, The Golden Compass í Bandaríkjunum) þegar ég las hana árið 1998. Ég las hana heilan dag og heila nótt og gat ekki sofnað fyrr en lestrinum var lokið.

Láttu líka heillast! Farðu með Lýru til London, til Noregs og Svalbarða, fylgdu henni í annan heim þar sem hún kynnist Will. Flakkaðu með þeim á milli hinna ýmsu heima og loks til lands hinna framliðnu. Leyfðu þér að gráta með þeim og hlæja með þeim. Ævintýraheimur Lýru er flóknari, frumstæðari, dýpri, sorglegri en samt glaðari og vonbetri en heimur Harry Potter.

 


Þennan vef gerði Anna H. Pálsdóttir. þýðandi þríleiksins.